Braif aan Kolossers 03
01As ie nou den mit Christus t levent ingoan binnen, zit den achter dij dingen heer dij boven binnen. Doar zit Christus aan God zien rechterhaand.
02Zet joen zinnen op wat of boven is, nait op wat hier op eerde is.
03Ie binnen ja sturven en joen levent is mit Christus verburgen in God.
04As Christus veurndag komt, joen levent, den zel ie ook mit hom in volle heren en veren veurndag kommen.
05Zai dus òf te kommen van wat of ter werelds aan joe is: klongeln, onzedelkhaid, haartstocht, minne verlangsten en aalbegereghaid. Wèl aalbegereg is, daint n ofgod.
06Om zokse dingen gaait God stravven wèl of nait om zien zeggen geven.
07Zukswat heb ie vrouger ook ommaans had dou ie doar joen slinger aan haren.
08Mor nou mout ie ook dat altmoal aan kaant doun: opvlaigendhaid, drift, minne streken, kwoadspreken en voelbekken.
09Ie maggen nkander nait bedraigen. Ie hebben ja olde mensk mit zien praktieken oettrokken.
10 Ie hebben nou nije mensk aantrokken. En dij krigt aalaan nij inzicht, zodat e op zien schepper begunt te lieken.
11 Woar dij is, doar proat ie nait meer over Griek of Jeud, besneden of onbesneden, barboar of Skyth, sloaf of vrij man. Doar is bie elkenain Christus t ain en t aal.
12 Nou ie bie God heuren as mensken dij hai oetzöcht het en van wèl of e holdt, loat nou dit joen nije plunje wezen: meedlieden, vrundelkhaid, nederghaid, zaachtzedeghaid, geduld,
13 zodat ie nkander verdroagen en nkander vergeven as ain over n aander min te spreken is. Net zo as de Heer joe vergeven het, mout ie dat ook doun.
14 En boven aal dizze aigenschoppen: laifde. Dij geft n baand doar ie nait oet lös kommen.
15 Loat Christus zien vree t veur t zeggen hebben in joen haarten. Veur dij vree bin ie ook ja as ain gemainschop roupen. Wees doar mor dankboar veur!
16 Geef in joen kring aan Christus zien bosschop ale roemte deur nkander mit alderhande wieze road te leren en te vermoanen. Zing oet dankboarhaid joen God van haarten psaalms, lofzangen en gaistelke laiden tou.
17 En netgliek wat of ie zeggen of doun, loat t aal gebeuren in de Heer Jezus zien noam. Daank God de Voader deur hom.
18 Vraauwlu, wees onderdoaneg aan joen man. Dat heurt ja zo woar de Heer woont.
19 Manlu, hol van joen vraauw en vaal nait tegen heur oet.
20 Kinder, wees geheurzoam aan joen olders. Dat wordt ja op pries steld doar de Heer woont.
21 Voaders, hoal joen kinder t bloud nait onder noagels vandoan. Aans konden ze moudveren wel ais hangen loaten.
22 Sloaven, wees joen boazen hier op eerde in ale opzichten geheurzoam. Nait deur heur noar ogen te kieken om bie heur in gunst te kommen, mor oprecht van haart, oet ontzag veur de Heer.
23 Wat of ie ook doun, loat joe t ainmoud wezen of dee ie t veur de Heer en nait veur mensken.
24 Ie waiten ja: ie kriegen van joen Heer der wat veur weerom: ie maggen dailen in zien aarvenis. Christus is ja de boas bie wèl of ie dainen.
25 Wèl of kwoad dut, krigt ook ja weerom wat of e doan het. En den moakt t God niks oet wèl of e veurhet.
|